1ܐَܢܵܫܵܐ ܗܲܕܟܼܵܐ ܚܵܫܸܒܼ ܒܵܗَܣܲܢ؛ ܐܲܝܟܼ ܚܸܠܡܲܬܟܵܪܹ̈ܐ ܕܡܫܝܼܚܵܐ؛ ܘܢܵܙܝܼܪܹ̈ܐ ܕܣܸܪܹ̈ܐ ܕܐܲܠܵܗܵܐ. 2ܠܲܐܟܼܵܐ ܗܲܪ ܟܹܐ ܦܵܝܫܵܐ ܛܠܝܼܒܬܵܐ ܡ̣ܢ ܢܵܙܝܼܪܹ̈ܐ؛ ܕܐَܢܵܫܵܐ ܡܗܘܼܡܢܵܐ ܦܵܝܸܫ ܡܫَܟ̰ܝܼܚܵܐ. 3ܐܝܼܢܵܐ ܐܵܗܵܐ ܡܸܢܕܝܼ ܪܵܒܵܐ ܙܥܘܿܪܵܐ ܝܠܹܗ ܠܟܸܣܠܝܼ ܕܦܵܝܫܸܢ ܕܝܼܢܵܐ ܡܸܢܵܘܟܼܘܿܢ؛ ܝܲܢ ܡ̣ܢ ܒܲܪܢܵܫܵܐ؛ ܐܸܠܵܐ ܐܘܼܦ ܐܵܢܵܐ ܓܵܢܝܼ ܠܹܐ ܝܘܸܢ ܒܸܕܝܵܢܵܐ. 4ܣܵܒܵܒ ܥܲܠ ܓܵܢܝܼ ܟ̰ܘ ܡܸܢܕܝܼ ܠܹܐ ܝܘܸܢ ܒܝܼܕܲܥܝܵܐ؛ ܐܸܠܵܐ ܒܐܵܗܵܐ ܠܵܐ ܦܸܫܠܝܼ ܡܘܼܟܫܸܛܵܐ؛ ܣܵܒܵܒ ܕܕܲܝܵܢܝܼ ܡܵܪܝܵܐ ܝܠܹܗ. 5ܣܵܒܵܒ ܕܐܵܗܵܐ ܠܵܐ ܗܵܘܝܼܬܘܿܢ ܒܸܕܝܵܢܵܐ ܡܸܢܕܝܼ ܡܩܵܕَܡ ܙܲܒܼܢܵܐ؛ ܗܲܠ ܕܐܵܬܹܐ ܡܵܪܝܵܐ؛ ܕܒܸܬ ܒܲܗَܪܸܢ ܡܸܢܕܝܼܵܢܹ̈ܐ ܛܸܫܝܹ̈ܐ ܕܚܘܼܒܼܝܵܐ؛ ܘܒܸܬ ܓܵܠܹܐ ܚܘܼܫܵܒܹ̈ܐ ܕܠܸܒܵܘܵܬܹ̈ܐ؛ ܘܗܿܝܓܵܗ ܒܸܬ ܗܵܘܹܐ ܚܸܩܪܵܐ ܠܟܠ ܐَܢܵܫܵܐ ܡ̣ܢ ܐܲܠܵܗܵܐ. 6ܘܐܲܢܸܐ؛ ܐܵܚܘܿܢܘܵܬܝܼ̈؛ ܒܚܵܬܸܪ ܕܝܼܵܘܟܼܘܿܢ ܡܘܼܬܸܒܼܠܝܼ ܒܛܘܼܦܣܵܐ ܕܝܼܝܼ ܘܕܐܵܦܲܠܘܿ؛ ܕܒܝܲܢ ܝܵܠܦܝܼܬܘܿܢ ܕܠܵܐ ܚܵܫܒܼܝܼܬܘܿܢ ܡܸܢܕܝܼ ܙܵܘܕܵܐ ܡ̣ܢ ܕܗ̇ܘ ܕܝܼܠܹܗ ܟܬܝܼܒܼܵܐ؛ ܕܐَܢܵܫܵܐ ܥܲܠ ܚܲܒܼܪܹܗ ܠܵܐ ܡܵܪܸܡ ܓܵܢܹܗ ܒܚܵܬܸܪ ܕܐَܚܹܪَܢܵܐ. 7ܣܵܒܵܒ ܡܵܢܝܼ ܩܲܡ ܦܵܪܸܫ ܠܘܼܟܼ؛ ܝܲܢ ܡܘܼܕܝܼ ܐܝܼܬ ܠܘܼܟܼ ܕܠܵܐ ܩܘܼܒܸܠܘܼܟܼ؛ ܘܐܸܢ ܩܘܼܒܸܠܘܼܟܼ؛ ܩܵܡܘܿܕܝܼ ܒܸܥܒܼܵܕܵܐ ܝܘܸܬ ܫܘܼܒܼܗܵܪܵܐ ܐܲܝܟܼ ܕܠܵܐ ܩܘܼܒܸܠܘܼܟܼ؛ 8ܡ̣ܢ ܓ̰ܲܠܕܹܐ ܣܒܼܝܼܥܠܵܘܟܼܘܿܢ؛ ܡ̣ܢ ܓ̰ܲܠܕܹܐ ܗَܘܹܠܵܘܟܼܘܿܢ ܕܵܘܠܲܬܡܲܢܕ؛ ܘܒܹܐ ܕܝܲܢ ܥܒܼܸܕܠܵܘܟܼܘܿܢ ܡܲܠܟܘܼܬܵܐ. ܘܛܘܼܒܼܵܐ ܕܥܵܒܼܕܝܼܬܘܿܢ ܗَܘܵܘ ܡܲܠܟܘܼܬܵܐ؛ ܕܐܘܼܦ ܐܲܚܢܲܢ ܥܵܒܼܕܵܚ ܗَܘܵܘ ܡܲܠܟܘܼܬܵܐ ܥܲܡܵܘܟܼܘܿܢ. 9ܣܵܒܵܒ ܒܸܚܫܵܒܼܵܐ ܝܘܸܢ؛ ܕܐܸܠܲܢ ܫܠܝܼܚܹ̈ܐ ܐَܚܵܪ̈ܵܝܹܐ ܡܘܼܬܸܒܼܠܹܗ ܐܲܠܵܗܵܐ ܐܲܝܟܼ ܕܠܡܵܘܬܵܐ؛ ܕܗَܘܹܐܠܲܢ ܬܵܡܵܫܵܐ ܠܥܵܠܡܵܐ؛ ܠܡܲܠܲܐܟܹ̈ܐ؛ ܘܠܒܢܲܝ̈ܢܵܫܵܐ. 10ܐܲܚܢܲܢ ܢܲܙܵܢܹ̈ܐ ܝܘܵܚ ܒܚܵܬܸܪ ܕܡܫܝܼܚܵܐ؛ ܐܝܼܢܵܐ ܐܲܚܬܘܿܢ ܥܵܩܸܠܕܵܪܹ̈ܐ ܒܡܫܝܼܚܵܐ؛ ܐܲܚܢܲܢ ܙܲܒܘܼܢܹ̈ܐ؛ ܘܐܲܚܬܘܿܢ ܚܲܝܠܵܢܹ̈ܐ؛ ܐܲܚܬܘܿܢ ܚܩܝܼܪܹܐ ܝܬܘܿܢ؛ ܘܐܲܚܢܲܢ ܡܘܼܒܸܨܪܹܐ. 11ܗܲܠ ܐܵܗܵܐ ܣܵܥܲܬ ܟܦܝܼܢܹܐ ܝܘܵܚ؛ ܘܨܸܗَܝܹܐ ܝܘܵܚ؛ ܘܫܘܼܠܚܵܝܹ̈ܐ ܝܘܵܚ؛ ܘܦܝܵܫܵܐ ܝܘܵܚ ܩܘܼܪܦܸܚܹܐ؛ ܘܒܲܝܬܵܐ ܕܟܠܵܝܵܐ ܠܲܝܬ ܠܲܢ؛ 12ܘܒܸܓ̰ܵܗَܝܵܐ ܝܘܵܚ ܟܲܕ ܒܸܦܠܵܚܵܐ ܒܐܝܼ̈ܕܵܬܲܢ. ܟܲܕ ܥܵܒܼܕܝܼ ܠܲܢ ܒܹܨܘܼܪ؛ ܟܹܐ ܒܵܪܟܼܵܚ؛ ܟܲܕ ܛܵܪܕܝܼ ܠܲܢ؛ ܟܹܐ ܩܵܒܠܵܚ؛ 13ܟܵܕ ܨܵܥܪܝܼ ܠܲܢ؛ ܟܹܐ ܦܲܪܦܸܠܵܚ ܒܝܼܵܝܗܝ. ܐܲܝܟܼ ܙܸܒܠܵܐ ܕܥܵܠܡܵܐ ܗَܘܹܐܠܲܢ؛ ܘܡܫܵܝܬܵܐ ܕܟܠ ܐَܢܵܫܵܐ؛ ܗܲܠ ܐܵܕܝܼܵܐ. 14ܠܹܐ ܝَܠܵܗ̇ ܕܡܲܢܚܸܦܸܢܵܘܟܼܘܿܢ ܒܸܟܬܵܒܼܵܐ ܝܘܸܢ ܐܲܢܸܐ؛ ܐܸܠܵܐ ܐܲܝܟܼ ܕܠܒܢܘܼܢܹ̈ܐ ܡܘܼܚܸܒܹ̈ܐ ܒܝܼܵܗَܒܼܵܐ ܝܘܸܢ ܢܲܨܝܼܗܲܬ. 15ܣܵܒܵܒ ܐܵܦܸܢ ܕܗܵܘܝܼ ܠܵܘܟܼܘܿܢ ܪܸܒܘܼ ܪܵܒܝܹܐ ܒܡܫܝܼܚܵܐ؛ ܐܸܠܵܐ ܠܵܐ ܪܵܒܵܐ ܒܵܒܵܘܵܬܹ̈ܐ؛ ܣܵܒܵܒ ܕܒܝܼܫܘܿܥ ܡܫܝܼܚܵܐ ܐܵܢܵܐ ܩܲܡ ܡܲܠܸܕܸܢܵܘܟܼܘܿܢ ܒܡܲܫܚܲܕܬܵܐ. 16ܒܲܣ ܦܲܪܦܘܼܠܹܐ ܝܘܸܢ ܒܝܼܵܘܟܼܘܿܢ؛ ܗܵܘܝܼܬܘܿܢ ܕܵܡܝܵܢܹ̈ܐ ܐܸܠܝܼ. 17ܣܵܒܵܒ ܕܐܵܗܵܐ ܫܘܼܕܸܪܝܼ ܠܟܸܣܠܵܘܟܼܘܿܢ ܠܛܝܼܡܵܬܹܐܘܿܣ؛ ܕܝܼܠܹܗ ܒܪܘܼܢܝܼ ܡܘܼܚܸܒܵܐ ܘܡܗܘܼܡܢܵܐ ܒܡܵܪܝܵܐ؛ ܗ̇ܘ ܒܸܬ ܡܲܕܟܸܪܵܟܼܘܿܢ ܐܘܼܪ̈ܚܵܬܝܼ ܕܒܡܫܝܼܚܵܐ؛ ܕܵܐܟܼܝܼ ܕܡܵܠܘܿܦܹܐ ܝܘܸܢ ܒܟܠ ܕܘܼܟܵܐ ܒܟܠ ܥܹܕܬܵܐ. 18ܐܝܼܢܵܐ ܐܲܝܟܼ ܕܠܹܐ ܝܘܸܢ ܗَܘܵܐ ܒܹܐܬܵܝܵܐ ܠܟܸܣܠܵܘܟܼܘܿܢ؛ ܚܬܸܪܘܿܢ ܚܲܕَܟܡܵܐ ܐَܢܵܫܹ̈ܐ. 19ܐܸܠܵܐ ܐܸܢ ܡܵܪܝܵܐ ܒܵܣܡܵܐ ܠܹܗ؛ ܓ̰ܲܠܕܹܐ ܒܸܬ ܐܵܬܸܢ ܠܟܸܣܠܵܘܟܼܘܿܢ؛ ܘܒܸܬ ܝܲܕܥܸܢ؛ ܠܵܐ ܗܹܡܸܙܡܵܢ ܕܐܵܢܝܼ ܕܡܵܪܘܿܡܹܐ ܝܢܵܐ ܓܵܢܵܝܗܝ؛ ܐܸܠܵܐ ܚܲܝܠܵܝܗܝ. 20ܣܵܒܵܒ ܡܲܠܟܘܼܬܹܗ ܕܐܲܠܵܗܵܐ ܠܹܐ ܝَܠܵܗ̇ ܒܗܹܡܸܙܡܵܢ؛ ܐܸܠܵܐ ܒܚܲܝܠܵܐ. 21ܕܵܐܟܼܝܼ ܒܵܣܡܵܐ ܠܵܘܟܼܘܿܢ؛ ܒܚܘܼܛܪܵܐ ܐܵܬܹܢ ܠܟܸܣܠܵܘܟܼܘܿܢ؛ ܝܲܢ ܒܚܘܼܒܵܐ ܘܒܪܘܼܚܵܐ ܡܵܟܝܼܟܼܬܵܐ؛